Co obxectivo de seguir impulsando a concienciación e a educación ambiental a nivel local e comarcal, o Concello de Boiro colabora co Foro Ecolóxico de Boiro e o IES A Cachada para a instalación de cabicheiros nas principais rúas do municipio. A concelleira de Medio Ambiente, Olga González; xunto cunha representante do Foro Ecolóxico de Boiro, Ana Vázquez; participou na mañá deste xoves 24 de agosto na presentación do proxecto.
Segundo fixeron saber na presentación, esta iniciativa de educación e concienciación ambiental do Foro Ecolóxico de Boiro comezou pola crecente preocupación do lixo que se tira nas contornas do municipio como son montes, praias e rúas. “Este proxecto xorde da problemática que producen as cabichas no medio natural e busca concienciar sobre a importancia de non tirar os cigarros ao chan”, indicaron dende o foro.
Esta preocupación levou a concienciar ás novas xeracións sobre a importancia de depositar o lixo correctamente nos contedores e alertar das consecuencias futuras. O proxecto estendeuse aos centros de ensino, en concreto o IES A Cachada, e o alumnado deseñou uns borralleiros e uns trípticos informativos que se veñen de instalar agora nas rúas máis céntricas do municipio.
“Dende o Concello de Boiro vimos moi importante formar parte deste proxecto que ten como finalidade espertar a conciencia ambiental e de coidado do medio ambiente e apostar por un futuro máis limpo”, afirmou a concelleira, Olga González.
Os borralleiros, explicou, estanse a colocar en lugares estratéxicos e que permiten ser baleirados de xeito periódico polo persoal de limpeza viaria, así como en locais hostaleiros.
