Os participantes do voluntariado ambiental organizado polo Concello de Ribeira, a través da Concellería de Cultura, Mocidade, Medio Ambiente e Benestar Animal, recolleron máis de 4.500 kg de residuos de plástico durante a duración do programa. Tamén se limparon uns 12 metros cúbicos de restos de tala.
A actividade, deseñada para 15 mozos e mozas de 18 a 30 anos, ten como obxectivo asegurar a protección, recuperación, fomento e difusión dos valores ambientais e do patrimonio natural do complexo dunar de Corrubedo e as lagoas de Carregal e Vixán.
Os traballos realizados consistiron en labores de mantemento do espazo natural como a reconstrución e consolidación de sendeiros, eliminación de especies invasoras, vixilancia de incendios, retirada de plásticos e microplásticos; e labores de información e sensibilización do visitante.
“A recollida de residuos nas praias é unha actividade crucial para preservar a beleza natural dos nosos contornos costeiros e garantir a saúde dos ecosistemas mariños.” explica a concelleira de Cultura, Mocidade, Medio Ambiente e Benestar Animal; Antía Alberte.
