Ecoloxistas en Acción demandou ante o Tribunal Superior de Xustiza de Galicia o Parque Eólico Banzas que pretende instalar Green Capital Power nos concellos de Outes, Negreira e Mazaricos. Tras ter presentado no seu día alegacións e un recurso de alzada ante a Consellería de Economía e Industria, a organización ecoloxista impugnará agora a decisión da Xunta presentando “unha demanda polo severo impacto paisaxístico, sobre o medio natural e acústico, dado que o ruído das turbinas emprazadas preto das vivendas suporá unha merma importante na saúde e na calidade de vida da poboación afectada”.
Ademais, a organización ecoloxista considera “un auténtico despropósito” que se aprobase este parque, dado que na mesma zona hai outros dez proxectos eólicos en tramitación (entre eles Maragouto, San Cosmeiro, O Vao, Vaqueira, A costa, Alvite, AlviteI I, Troitomil, Vilartoxo..) e dous en funcionamiento (Serra de Outes e Corzán).
Ecoloxistas en Acción sinala que “esta concentración de aeroxeradores sumada ao resto de parques e ao impacto das acometidas de alta tensión para evacuar a enerxía eléctrica traería irreparábeis consecuencias ao ecosistema da zona”. Destacan que “non se realizaron estudos hidrolóxicos e hidroxeolóxicos nin avaliado os impactos sobre Rede Natura 2000, a pesar das graves afeccións que carrexará a construción do parque eólico as zonas húmidas de gran valor existentes na zona”.
O colectivo ecoloxista considera que “é requisito indispensábel analizar os efectos ocasionados polo parque eólico Banzas de xeito individual, pero tamén de xeito acumulativo tendo en conta o resto de instalacións existentes ou proxectadas, dado que os principais efectos sinérxicos non só se poden desenvolver sobre a paisaxe e a avifauna, como indica a empresa promotora, senón tamén sobre a poboción dos núcleos directamente afectados”.
Tanto Ecoloxistas en Acción como as organizacións veciñais afectadas estanse a preparar para emprender unha nova batalla legal apelando a “conservar a naturalidade” do entorno rural afectado polo parque eólico Banzas.
“Esta construción podería supor un cambio importantísimo na paisaxe, que se vería afectada de forma radical ademais do resto de afeccións mais que severas a este enclave tan próximo a zonas protexidas”, denuncia Roberto Vilela voceiro de Ecoloxistas en Acción.
