Dous días -luns, 21, e martes, 22- serán os que precise o Rei para resolver a súa rolda de consultas encamiñadas a designar candidato á investidura á presidencia do Goberno. Nesta serie de audiencias participarán un total de sete formacións políticas, por canto Yolanda Díaz representará a todos os partidos que integran SUMAR e hai catro que declinaron acudir: ERC, Bildu, Junts e BNG.
Após a constitución o xoves pasado das Cortes, a presidenta do Congreso, Francina Armengol, acudiu este venres á Zarzuela para informar ao Xefe do Estado da sesión constitutiva e, ao mesmo tempo, presentar a Felipe VI a lista de partidos que xa amosaron a súa dispoñibilidade a se presentar á rolda de consultas.
A Casa do Rei xa deu a coñecer o venres pola mañá o calendario desta rolda de consultas cos partidos organizados de menor a maior segundo o resultado obtido nas eleccións xerais do pasado 23 de xullo,
A rolda comezará ás 10,30 do luns co presidente de Unión del Pueblo Navarro (UPN), Javier Esparza, a formación foral que obtivo menor representación no Congreso. Seguirán os representantes de Coalición Canaria, PNV, SUMAR, VOX, PSOE e PP.
A nova presidenta do Congreso, a socialista Francina Armengol, defendeu que se podan utilizar as línguas cooficiais na Cámara, tendo en conta, dixo, que unha das forzas de España é a súa diversidade e riqueza lingüística “e o Congreso debe representar a España real”.
Tras a reunión de Armengol co Rei, tivo lugar a do novo presidente do Senado, o popular Pedro Rollán.
VOX estaría disposto a apoiar a investidura de Alberto Núñez Feijoo, malia o que cualificou de “desprezo” dos populares ao non lles ceder un posto na constitución da Mesa da Cámara Baixa. Polo que transcendeu da formación de Santiago Abascal, o PP pode seguir a contar cos 33 deputados de VOX para a investidura, sen esixir entrar no Goberno, aínda que tamén se fala de que non sería unha cesión sen nada a cambio.
ERC, pola súa banda, vai esixir, dixo, unha lei de amnistía para os implicados na causa do referendo do 1 de outubro, cuestión que marcará unha “liña vermella” na negociación. Junts afirma que non vai “volver ao rego” e que non rebaixará o ton das súas demandas nin posicións. Puigdemont, líder de facto desta formación política, segue a xogar a súa baza persoal sen que, na realidade, se saiba cal é, se ben deixa claro que “unha cousa é a Mesa do Congreso e outra a investidura”.
