Este venres inaugúrase en Boiro o Mercado Castrexo, que manterá abertas as súas portas (na rúa Peonil) até o domingo 13. Haberá postos de artesanía e alimentación, xogos tradicionais para a rapazada e animación de rúa (con loitas castrexas teatralizadas). Tamén, un ano máis, haberá un campamento castrexo e oficiaranse vodas celtas para as parellas que queiran formalizar a súa unión dun xeito alternativo.
A organización (a empresa XEmA Comunicación Global en colaboración co Concello de Boiro) lanzou un chamamento a residentes e visitantes para que se impliquen na feira ataviados con vestimentas e adobíos propios da época castrexa e celta. Os postos abrirán este venres pola tarde e mañá e o domingo o horario será de mañá e de tarde.
