A Asociación de Mulleres do Barbanza (Mulleres en Acción) volve ás rúas para seguir loitando novamente contra as violencias e as discriminacións machistas, unha loita que segue a ser necesaria tal e como quedou manifesto co recente “caso Rubiales” e a agresión da que foi vítima a xogadora Jenni Hermoso trala vitoria de España no Mundial de Fútbol feminino, de mans do presidente da Federación Española. “Volvemos ás rúas de Galiza fronte a un sistema que non respecta as mulleres. Estamos con Jenni Hermoso e con todas as mulleres que sofren calquera tipo de agresión machista. Grazas Jenni por abrir camiño”, sinalan dende a Asociación Mulleres do Barbanza, que se concentran este luns 28 de agosto na praza do Concello de Ribeira, ás 20.00 horas. A maiores das integrantes do colectivo e da cidadanía en xeral, confirmaron a súa participación no acto membros da Corporación local.
