Os 40 nenos e nenas do Lousame Concilia Verán 2023, de entre 3 e 12 anos de idade, celebraron este xoves 31 de agosto unha festa de clausura das actividades do programa de conciliación levado a cabo polo Concello nos meses de xullo e agosto.
As iniciativas desenvolvéronse nas instalacións do CPI Cernadas de Castro, no Polideportivo Municipal Pilar Barreiro Senra ou na Piscina Municipal, en horario de 9:30 a 14:30 horas.
A rapazada desfrutou de xogos grupais, actividades deportivas, saídas á piscina, sesións de contacontos e cinema, traballos manuais, excursións… e dunha festa final con lambonadas.
O Lousame Concilia Verán 2023 foi organizado pola Concellería de Igualdade de Lousame, en colaboración coa Consellería de Promoción do Emprego e Igualdade e co Programa Corresponsábeis do Ministerio de Igualdade.
