A Rede Galega de Praias sen Fume conta xa con 224 areais libres de tabaco, logo de incluír 10 máis. Dita rede, que ten un fin educativo e de sensibilización social, “remarca a importancia da conduta da poboación adulta coa idea de que sirva de modelo para os máis novos”, en palabras da Xunta.
As dez praias que se engaden á rede son, ademais da Magdalena en Cabanas, as de Área Maior, Agrocovo, O Fogareiro, O Portiño do Maio e Reimúndez, todas elas no concello de Muros; e as do Espiñeiro, Mera, Naval-Santa Cruz e Santa Cristina desaugadoiro do río, no concello de Oleiros.
Carmen Durán, directora xeral de Saúde Pública, sinalou que o Programa Praias sen Fume botou a andar no ano 2016, “sendo Galicia a primeira comunidade que puxo en marcha un proxecto deste tipo”. Os seus obxectivos inciden na promoción dunha vida sen tabaco, a desnormalización do seu consumo na sociedade e o respecto e o coidado das praias e do medio ambiente.
A directora xeral amosouse este venres 11 de agosto, na presentación das novas incorporacións, moi contenta cos resultados e confía en que “nos acheguen ao obxectivo da Xunta de reducir no 2027 a incidencia do consumo do tabaco diario na poboación adulta por baixo do 15% e nos adolescentes por baixo do 5%”.
