Dende este xoves 17 de agosto e até o 29 de setembro poderemos desfrutar na Casa da Cultura de Portosín dunha mostra que rende homenaxe á vila mariñeira e aos seus recunchos máis destacados e memorábeis. Trátase da exposición de cadros Portosín: Mar, Terra e outras Augarelas, de Beatriz F. Ferrín. Poderemos vela na sala de exposicións da Casa da Cultura e con entrada libre.
Beatriz Ferrín é unha artista local autodidacta que destaca pola calidade de súa técnica no formato das acuarelas. Os seus traballos están inspirados na súa maioría no municipio mariñeiro e inclúen homenaxes á arquitectura local, ás súas xentes e á súa impoñente paisaxe marítima. Ferrín mostra o seu talento nas redes sociais a través da súa firma, Augarela.
