Cedida
O conselleiro do Mar, Alfonso Villares, salientou hoxe a importancia de citas gastronómicas como a Festa do Percebe de Aguiño para enxalzar o traballo dos profesionais da pesca e dar a coñecer en todo o mundo a calidade dos produtos do mar de Galicia. Neste sentido, destacou a relevancia dunha cita
que chega este ano á súa XXIV edición tras ser declarada o ano pasado como festa de interese turístico galego polo Consello da Xunta.
O titular de Mar recoñeceu durante este evento -ao que tamén asistiron a directora xeral de Desenvolvemento Pesqueiro, Susana Rodríguez, e o presidente de Portos de Galicia, José Antonio Álvarez- o traballo da confraría de pescadores de Aguiño-Carreira e o arriscado labor dos percebeiros, gabando a excelencia e calidade do crustáceo que colleitan.
Tamén tivo mencións especiais para os dous Percebeiros de Honra desta edición: Manuel Ruiz Rivas, que foi alcalde da localidade durante 12 anos e agora senador, polo seu apoio ao sector do mar e á festa gastronómica por excelencia de Ribeira; e Rubén Lijó, que durante 15 anos foi rescatador no helicóptero Pesca 1 de Gardacostas de Galicia. O acto contou tamén coa presenza amais do alcalde de Ribeira Luís Pére e do Concelleiro, Vicente Mariño de Bricio.
A Xunta destaca a importancia da Festa do percebe de Aguiño como escaparate para dar a coñecer a calidade dos produtos do mar
Pola súa banda Rianxo acolleu con éxito unha nova edición da súa Festa do Mexillón. A degustación do bivalvo da ría corría por conta do Club de Remo e a Asociación Gastronómica e Cultural da Festa do Mexillón que fixo seis preparacións distintas máis un prato degustación para quen quixese catar todas as receitas. A proposta, que alcanzou a súa duodécima edición, foi todo un éxito e servíronse unhas catro mil racións.
