A Feira Artesanal e Mariñeira Artemar volve ás rúas da cidade de Ribeira. Farao do 17 ao 20 de agosto e co obxectivo de “animar e dinamizar o verán no municipio”, segundo fixeron saber na presentación da nova edición do evento o rexedor Luís Pérez Barral e os concelleiros de Mar e Turismo, Fernando Abraldes e Francisco Suárez-Puerta, que engadiron que a feira contará novamente con postos de venda de artesanía e espectáculos culturais. Ademais, explicaron, “a feira estenderase ao longo das zonas peonís facendo un percorrido integrado polas rúas de Galicia, Rosalía de Castro, Santa Uxía, Porta do Sol e praza do Concello”. Nestas localizacións instalaranse postos venda de produtos de alimentación e artesanía, así como tamén obradoiros demostrativos de oficios como o das redeiras, actividades infantís e contacontos.
“É preciso potenciar os produtos do noso mar como o lirio ou a sardiña, aqueles que
pescamos cos nosos barcos a diario” afirmou Fernando Abraldes, concelleiro delegado da
área de Mar. Pola súa parte, Francisco Suárez-Puerta, concelleiro de Turismo e Festexos explicou que o evento “pretende ofrecer unha alternativa máis de ocio aos ribeirenses e atraer visitantes ao municipio cunha feira temática que favoreza ao comercio e hostalaría local.”
Durante a feira mariñeira celebraranse espectáculos nocturnos na praza do Concello, contando coa implicación de asociacións e artistas locais. O peche da feira será o domingo 20 cun sorteo ás nove e media na praza do Concello e o conxuro da queimada, con degustación gratuíta ata esgotar existencias.
“Atendendo ás demandas de anos anteriores, os días 17, 18, 19 e 20, restrinxirase a circulación de vehículos só de 12:00 a 14:00 e de 20:00 a 22:00. Nas restantes horas permitirase o tráfico para que os veciños e veciñas que viven nas rúas afectadas poidan acceder ás súas vivendas e garaxes”, aclarou o alcalde Luís Pérez.
