Este martes 8 de agosto o Diario Oficial de Galicia publicou a encomenda do Goberno galego á empresa Tragsa da mellora na EDAR (Estación Depuradora de Augas Residuais).
Os traballos, que contan cun prazo de execución de 10 meses, céntranse na reforma, transformación e modernización dos distintos elementos que compoñen a planta de tratamento de augas municipal e mellorar o saneamento da ría de Noia.
Esta nova intervención da Xunta inclúense no Plan de Saneamento Local e redundarán, en palabras da Xunta, “na mellora da calidade de vida dos veciños e no futuro da pesca, do marisqueo e do turismo”.
O Goberno galego engade que a día de hoxe “as instalacións municipais de tratamento de augas residuais de Noia presentan deficiencias en distintos equipos de funcionamento e de capacidade, provocando vertidos contaminantes á ría”. Ademais, o propio edificio que alberga a depuradora presenta deficiencias na estrutura, “precisando da renovación da metade da cuberta e das baixantes, fundamentalmente polo ambiente corrosivo, así como da instalación dun bo sistema de ventilación para evitar que o proceso corrosivo se reproduza”.
As obras
Para solucionar estes problemas coa encomenda da entidade hidráulica da Xunta a Tragsa, os traballos céntranse na reforma, transformación e modernización dos distintos elementos que compoñen a planta de tratamento de augas residuais municipal.
Máis polo miúdo, entre os traballos inclúese a instalación dunha nova reixa de grosos automática, previa ao bombeo de cabeceira, interceptando as conducións de entrada antes da reixa existente e deixándoa como by-pass, para o que se instalarán comportas para independizar cada unha das canles.
Amais, instalarase unha ponte desareadora desengraxadora que enviará as areas ao clasificador de areas e as graxas ao concentrador.
Disporase un novo equipo de produción de microburbulla para optimizar do proceso do sistema de flotación por aire disolvido para a optimización do proceso da auga a tratar.
Na reforma desta planta de tratamento de augas residuais inclúese, tamén, a instalación de novos equipos de dosificación de reactivos.
As actuacións, ademais, “prevén a renovación da metade da cuberta do edificio que queda por substituír e das baixantes de recollida de auga”, sinálase, engadíndose que “tamén se incluirá a instalación de sistema de ventilación para a renovación do aire do edificio”.
Esta intervención enmárcase no convenio selado entre a Xunta e o Concello de Noia, polo que a Administración autonómica comprométese a executar e financiar integramente as actuacións; e a Administración local, pola súa banda, asume a recepción, mantemento e conservación das actuacións que se leven a cabo.
A intervención será co-financiada pola Unión Europea a través do Fondo Europeo de Desenvolvemento Rexional (FEDER) no marco do programa Feder Galicia 2014-2020 e do programa Galicia Feder 2021-2027.
A Xunta leva investido nos últimos anos 4,7 millóns de euros en actuacións de apoio ao Concello de Noia en materia de infraestruturas hidráulicas, destacando a execución da rede de colectores xerais ou a mellora da depuradora.
