A Mancomunidade Barbanza Arousa presentouse esta mañá a Rede Comarcal de Sendeiros. Estes sendeiros veñen a reforzar a oferta dispoñible para a realización de actividades en contacto coa natureza, tan demandadas na actualidade, tanto para os veciños e veciñas de Barbanza Arousa como para os visitantes e turistas.
A información das rutas está dispoñible na web da mancomunidade www.barbanzarousa.gal no seu apartado “deporte e natureza”, no que se poden consultar as características e datos de interese dos catro sendeiros:
- No concello de Rianxo: PR-G 261 Roteiro do Río Té
- No concello de Boiro: PR-G 264 Roteiro do Castelo de Vitres
- No concello da Pobra do Caramiñal: PR-G 263 Subida á Curota polo Río Pedras
- No concello de Ribeira: PR-G 265 Senda Fluvial do Río Artes
Estes catro sendeiros acadaron a homologación pola Federación Galega de Montañismo e atópanse perfectamente sinalizados, sendo aptos para todos os públicos.
Con este proxecto da Rede Comarcal de Sendeiros fortalécese a imaxe do destino Barbanza Arousa como un destino para o turismo familiar, no que a sustentabilidade e calidade son base para o desenvolvemento da actividade turística.
Ao acto asistiron o alcalde de Boiro, José Ramón Romero, presidente da mancomunidade, o alcalde de Rianxo, Julián Bustelo, o alcalde da Pobra do Caramiñal, José Carlos Vidal e o concelleiro de Turismo, Festexos, Relacións Institucionais e Novas Tecnoloxías do Concello de Ribeira, Francisco Suárez. Así mesmo, participaron na presentación destes sendeiros, Fátima Cachafeiro, xerente da mancomunidade e Xoán Fontaíña, asesor técnico no deseño destas rutas.
