A sede da patronal acolleu este 4 de agosto a presentación da segunda entrega da Feira Gastromar, impulsada dende a Asociación de Empresarios de Ribeira en colaboración coas Confrarías de Aguiño e Ribeira, cos produtores de mexillón (OPMEGA), co Concello de Ribeira e, tamén (nesta segunda edición), coa Cooperativa de Armadores de Ribeira. O obxectivo será novamente “poñer en valor e dar a coñecer os peixes e mariscos da nosa ría”, sinalaron, ao tempo que destacaban a necesidade de reivindicar os produtos que, polas razóns que sexan, non adquiren as meirandes cotización e demanda no mercado. Na cita participaron, entre outros, o presidente da patronal, Francisco Martínez Gude, e máis o alcalde Luís Pérez Barral. A nova edición de Gastromar terá formado de gran degustación, e celebrarase os días 25, 26 e 27 de agosto no mesmo escenario elixido para a primeira edición: a praza de España de Ribeira. A intención dos organizadores é mellorar a implicación, a participación e a visibilidade da convocatoria anterior, “da que quedamos moi satisfeitos dos logros alcanzados”, sinalou o presidente da asociación, Francisco Martínez Gude.
