O domingo 16 de xullo, no marco da programación das Festas da Virxe do Carme, o grupo de música galega Treixadura ofrecerá un concerto na praza Castelao de Rianxo. A actuación, que comeza ás 22.30 horas, servirá para presentar na nosa comarca o novo disco da agrupación, Camiño longo.
A cita vén da man do Concello de Rianxo ao abeiro da programación da Rede Cultural da Deputación da Coruña.
Camiño longo
O libro-disco (de 104 páxinas) Camiño longo foi gravado nos estudios Casa de Tolos, en Mañufe, Gondomar, e Edisco, A Estrada, durante os meses de xaneiro a marzo de 2020. Conta coas colaboracións da Banda Municipal de Música de A Coruña, do Coro Cantigas e Agarimos e do músico noiés Rodrigo Romaní. Camiño longo, en palabras dos compoñentes de Treixadura é “o rexistro dunha parte da vida que compartimos con todas as persoas que nos seguides: 30 anos de emocións que embotellamos coa esperanza de que vos leven, coma a nós, a revivir momentos entrañables”.
