O Festival da Lúa celebrarase en Rianxo os días 28 e 29 de xullo (venres e sábado). Trátase dunha iniciativa que combina diferentes disciplinas artísticas e iluminación en espazos e edificios do municipio e que está organizada polo Concello coa colaboración de SnellvanRoyen, a Mancomunidade de Municipios Barbanza Arousa, a Escola de Música de Rianxo, a Escola de Danza Oitos e Fotos de Rianxo. As actividades previstas desenvolveranse nas dúas ditas xornadas a partir das 22.00 horas.
O Festival da Lúa é un certame que busca novos, alternativos e innovadores xeitos de achegarnos á cultura (arte, historia, patrimonio, sociedade, etc) a través das técnicas e das tecnoloxías lumínicas máis avanzadas, presentes en diversos e emblemáticos puntos do vila e a súa contorna. O obxectivo da experiencia de dúas xornadas, en horario nocturno, é converter Rianxo “nun referente turístico, cultural e tecnolóxico”, ao tempo que se ofrece “un distinto de percorrer o concello”.
Na primeira edición, baixo o lema Alumeando letras, proporcionouse unha perspectiva do valioso patrimonio literario do concello a través de intervencións artísticas baseadas na luz e no son. As obras de iluminación artística desenvolvéronse en diferentes edificios e lugares da vila (Casa Museo de Manuel Antonio, Casa Museo de Rafael Dieste, Casa de Castelao, Pazo de Martelo, Peirao de Setefogas, etc).
