Concluído o prazo de presentación de ofertas foron 12 as empresas interesadas na actuación consistente na renovación de servizos e pavimentación da rúa da Cambra, localizada na parroquia de Palmeira (Ribeira).
O Concello explica que o proxecto ten un orzamento de 82.069,87 euros e un prazo de execución de tres meses. A rúa en cuestión conta na actualidade “cun pavimento de formigón bastante deteriorado e ademais os servizos urbanos de auga para consumo, saneamento e pluviais son moi antigos”, apuntan fontes do Consistorio.
O proxecto elaborado prevé mellorar as condicións de accesibilidade e funcionalidade da rúa creando unha plataforma única na que vehículos e peóns circulen na mesma cota, dando prioridade ao tránsito peonil. Con tal motivo substituirase o firme actual por un novo pavimento de formigón no que se intercalarán franxas transversais de lousas de granito.
Tamén serán renovados, mellorados e modernizados os servizos de saneamento, pluviais e abastecemento de auga para consumo.
O investimento foi incluído no Provincial de Cooperación ás Obras e Servizos de Competencia Municipal (Plan Único de Concellos) POS+ 2022.
