V Travesía Arousaman – Arousawoman.
Máis de corenta nadadores participaron na quinta edición da Arousaman-Arousawoman que se desenvolveu entre praias de Confín, no Grove, e de Coroso, en Ribeira. A proba busca visibilizar o dano cerebral adquirido e celebrou a súa quinta edición .
A travesía marítima comezou no Grove preto das 9.00 horas, momento no que 44 nadadores se mergullaron nas augasdirección á capital de Barbanza. O traxecto tivo unha duración de cinco horas.
A proba desenvolveu o seu primeiro tramo baixo a choiva e a auga fría que non deixou de facer efecto nos participantes, un factor que se agravou ao chegar á illa de Santa Uxía de Rúa, na que o vento do nordeste fixo acto de presenza. En total, 17 deportistas lanzáronse á auga sen neopreno poñendo a proba as súas capacidades. Un dos participantes tivo que abandonar a metade de camiño por sufrir un principio de hipotermia.
Preto das 14.30 chegaron á praia de Coroso. Durante a probe estiveron presentes 107 voluntarios repartidos entre terra e mar, Gardacostas de Galicia, Cruz Vermella, Salvamento Marítimo e as proteccións civís do Grove e Ribeira.
O goberno local de Ribeira apoiou a proba deportiva solidaria Arousaman – Arousawoman. O alcalde Luís Pérez e o concelleiro de Deportes, Xabier Vidal, estiveron recibindo os nadadores e nadadoras aos que parabenizaron por participar nesta proba que pretende visibilizar o Dano Cerebral Adquirido. O rexedor amosou o agradecemento á xente de Arousaman e da Asociación de Dano Cerebral Sarela pola organización da actividade.
