Este mércores 19 de xullo presentáronse na Lonxa de Ribeira os resultados do proxecto Mar de Amicos e as vindeiras actividades previstas ao abeiro desta iniciativa. O acto veu da man da asociación da nosa comarca Amicos e Fundamar. Segundo fixeron saber, o dito proxecto ten como obxectivo principal xerar oportunidades laborais para persoas con discapacidade e promover o turismo inclusivo e accesíbel na contorna do patrimonio marítimo pesqueiro. “Buscamos crear conciencia sobre a importancia da inclusión e a accesibilidade, á vez que destacamos a riqueza cultural e o patrimonio das nosas costas”, sinalaron os responsábeis das dúas entidades.
Durante o acto presentouse o calendario de actividades para este verán, no que se contemplan visitas a lonxas, portos, estaleiros, conserveiras, empresas de transformación, cetarias, bancos marisqueiros, entre outros.
Ao longo deste proxecto, Amicos e Fundamar lograron capacitar a 7 persoas con discapacidade en diferentes roles relacionados co turismo, guías turísticos, axentes de turismo inclusivo, etc. “Estas oportunidades brindaron unha maior independencia e autoestima aos participantes, así como a contratación dun deles”, explicaron, engadindo que “tamén se traballou en estreita colaboración coas autoridades locais e as comunidades costeiras para mellorar a accesibilidade nos sitios turísticos do patrimonio marítimo pesqueiro”.
O fin último foi asegurar que todas as persoas poidan gozar plenamente da experiencia turística, sen importar as súas capacidades.
No acto aproveitouse para entregar o distintivo Mar de Amicos aos seguintes axentes locais: Lonxa de Ribeira, CONGALSA, Da Lonxa ou Prato, Conservas Lou-Alma Galega, Turismo da Pobra do Caramiñal, Asociación de Mariscadores Mar da Pobra, Asteleiro Triñanes, Cetaria Anxo Mar e a Sociedade Cultural e de Tradicións “A Gamela de Cabo de Cruz”.
Durante a xornada contouse coa participación do secretario xeral de Apoio ao Emprego, Traballo Autónomo e Economía Social, Pablo Fernández, que mostrou a súa “honra” por formar parte dun proxecto que quere “impulsar a promoción do turismo inclusivo e accesíbel arredor do patrimonio marítimo pesqueiro, en base aos principios da economía social”. Destacou que Mar de Amicos estea centrado en “xerar oportunidades reais de empregabilidade para as persoas con discapacidade”.
Pola súa banda, o director de Amicos, Xoan España destacou que “estas oportunidades brindan unha maior independencia e autoestima aos participantes, así como poder lograr atopar un posto de traballo”.
A un nivel máis concreto, España lembrou que logo das formacións impartidas como axente de turismo inclusivo, unha das sete persoas con discapacidade, Laura Castro, empezará a traballar este xoves 20 de abril para unha das empresas de economía social que creou a entidade.
Outros dous participantes foron, Begoña Abeijón, directora xeral de Persoas con Discapacidade; Luis Pérez Barral, alcalde de Ribeira; Javier Touza, presidente de Fundamar; María Caldeiro, xerente de Fundamar; Xoan España, director xeral de Amicos, entre outros.
Fundamar e Amicos desenvolverán durante este verán, co apoio da Rede Eusumo dá Xunta de Galicia, o proxecto Mar de Amicos.
