Uns cen nenos e nenas dos Campamentos de Verán de Lousame, de idades comprendidas entre os 6 e os 14 anos, desfrutaron dunha xornada de piragüismo en Outes. A expedición desprazouse en dous autobuses de Autos Comparado dende o Polideportivo Pilar Barreiro ata as instalacións de piragüismo da contorna de Pontenafonso. Durante tres horas os pequenos puideron gozar dun paseo nas piraguas, con mergullos incluídos.
A actividade desenvolveuse por quendas, así que mentres parte dos nenos navegaban pola ría, os demais aproveitaron para bañarse e xogar á pelota na beira. O obxectivo desta excursión é que a mocidade adquira e desenvolva valores como o compañeirismo, a comunicación, o traballo en equipo, a responsabilidade e o respecto. A concelleira de Xuventude e Voluntariado, Silvia Agrafojo, destacou que “a rapazada pasouno moi ben nesta saída” e aproveitou para “agradecer unha vez máis a colaboración do voluntariado xuvenil, sen cuxa participación sería imposíbel desenvolver este tipo de actividades”. Así, ademais dos monitores dos Campamentos, por cada grupo de 10 nenos e nenas estaban dispoñibles 3 mozos/as voluntarios/as.
Os Campamentos de Verán do Concello de Lousame finalizarán este venres 21 de xullo cunha gran celebración con inchables e una festa da escuma. Dende o luns 10, os nenos e as nenas desfrutaron de actividades lúdicas, culturais e deportivas na natureza, como saídas á piscina, tiro con arco, zumba e unha excursión ao Aquapark de Cerceda.
