O programa Mulleres contando no Pazo, impulsado pola Concellería de Cultura de Boiro para reivindicar a óptica feminina da narración oral galega do noso tempo ao tempo que se dinamiza e enriquece o importante papel cultural que xoga o Pazo de Goiáns na súa nova vida, vai continuar este domingo 25 de xuño cun novo espectáculo: O comezo do mundo, con Soledad Felloza. Dará comezo ás 21.00 horas e está enfocado a público adulto. Organiza a Área de Cultura do Concello de Boiro coa colaboración da Deputación da Coruña.
O comezo do mundo é unha narración que nos leva emocionalmente a distintos lugares da nosa terra e que nos propón volver ás lareiras para a escoltar as historias que xa existen e non permitir que esmorezan. É un espectáculo para redescubrir as historias das mulleres elaborado, a lume lento, nas viaxes de Sole polo país preparando o terreo para subir esas mulleres ao escenario “para contar de tempos sen tempo”. Así falan as señoras Lola, Juana, Emérita, Palmira, Otilia, Erundina e tantas outras ao carón da lareira, ao redor da cociña de ferro. Nese altar da memoria que empeza nas súas mans e medra nos seus ollos.
