O Concello de Outes informou do remate das obras da senda peonil que une o centro urbano da Serra coa Piscina Municipal. Os traballos financiáronse a través do Plan Único da Deputación e tiveron como obxectivo mellorar a seguridade dos peóns na contorna, poñendo o foco nas persoas usuarias do dito complexo deportivo. A actuación permitiu crear un itinerario de 300 metros de lonxitude e 2 metros de ancho pola marxe esquerda da estrada. A senda formouse con saburra de canteira e acabado con formigón coloreado, rematándose con bordos de delimitación e bolardos, luces LED e unha varanda de ferro. Os traballos incluíron previamente a canalización para a recollida de pluviais e a da iluminación.
