A conselleira de Política Social e Xuventude, Fabiola García, visitou este venres 16 de xuño a sede na Pobra, no Polígono da Tomada, da empresa CONGALSA, referente galego e estatal no sector da alimentación e dos produtos do mar. A conselleira aproveitou a súa estadía para informar do compromiso do seu departamento autonómico coa inserción laboral da mocidade, a través, principalmente, do programa Xuventude Mentoring. En CONGALSA departiu con destinatarios do programa e, tamén, con mentores.
A conselleira sinalou que a través de Xuventude Mentoring a Xunta apoia á xuventude a integrarse no mercado laboral, a poñerse en contacto co mundo empresarial e resolver as súas dúbidas sobre as súas áreas de especialización. Durante o acto coñeceu a algúns dos mozos e mentores que participaron no programa durante estes anos.
Fabiola García engadiu que “logo do éxito das tres pasadas edicións aprobouse a posta en macha de dúas novas edicións deste programa e tamén o impulso dunha nova modalidade de Xuventude Mentoring na Empresa, co que se promoven estadías de tres meses en empresas para seguir promocionando o contacto co mundo empresarial”.
Pola súa banda, a directora de Relacións Externas de CONGALSA, Isabel Cañas, eloxiou o programa Xuventude Galicia Mentoring pola súa capacidade de “tender pontes entre o tecido empresarial galego e a xuventude” que se incorpora ao mercado laboral. Ao tempo, resaltou a aposta da compañía pola formación continua como un dos seus piares de gobernanza e por incorporar xente nova ao seu cadro de persoal. De feito, tal e como indicou Cañas, “o 40% dos nosos traballadores teñen menos de 35 anos”.
