Segue en Porto do Son a actividade do alumnado do Certificado de Confección e Montaxe de Artes e Aparellos do Obradoiro de Emprego Tahume VIII, logo do importante traballo ambiental e funcional despregado na praia do Cruceiro, do que falamos os días pasados dende O Barbanza.
Agora, as e os participantes no obradoiro de emprego de Porto do Son (co-impulsado polo Concello de Ribeira) fixeron entrega das redes que confeccionaron para as porterías de fútbol sala das pistas do CEIP de Portosín, do Colexio de Santa Irene, do Polideportivo de Santa Irene e máis da Pista Polideportiva de Queiruga. Tamén elaboraron as redes para as porterías de fútbol 7 e fútbol 11 do Campo Municipal Emilio García.
O Obradoiro de Emprego Tahume (oitava edición) comezou o pasado 3 de outubro, sendo a súa finalidade favorecer a inserción laboral das persoas desempregadas dos dous municipios (Ribeira e Porto do Son) a través de formación especializada, avanzada e dunha índole marcadamente práctica, poñendo o foco na mocidade local. Un total de vinte alumnos e alumnas participan nesta convocatoria, unha edición dual con dúas especialidades distintas: por unha banda operacións básicas de cociña e pastelería e, pola outra, confección e montaxe de artes e aparellos.
