A veda da centola no litoral de Galicia comeza este sábado 24, cun inicio unificado nas tres provincias marítimas, e prolongarase ata o vindeiro 5 de novembro no caso das provincias da Coruña e Pontevedra (dende A Guarda ata cabo Corrubedo e de cabo Corrubedo ata cabo Estaca de Bares) e na provincia de Lugo a veda iniciarase o 3 de xullo e prolongarase ata o 27 de novembro entre estaca de Bares e o río Eo, incluíndo a ría do Barqueiro.
Mentres, a veda do boi comezará o vindeiro 2 de setembro e prolongarase ata o vindeiro 5 de novembro, de acordo coa resolución pola que se aproba o plan de xestión das dúas especies para a campaña 2023-2024.
A prohibición de extraer centola en todo o litoral de Galicia comeza ás 00,00 horas de mañá, 24 de xuño, e estenderase ata as 00,00 horas do domingo 5 de novembro nas costas da Coruña e Pontevedra e ata as 00,00 horas do domingo 26 de novembro na costa de Lugo. No caso do boi, a veda prolongarase en todo o litoral de Galicia desde as 00,00 horas do sábado 2 de setembro ata as 00,00 horas do domingo 5 de novembro.
Nestes períodos queda expresamente prohibida a captura destas especies para todas as embarcacións por medio de calquera arte. De feito, as embarcacións dedicadas á captura de centola e boi con nasas deberán retiralas do seu calamento no momento en que comece a correspondente veda e levalas a porto.
