A organización Ecoloxistas en Acción presentou o seu informe Bandeiras Negras 2023, co que expón os “casos máis significativos de contaminación e mala xestión ambiental das costas do Estado español”. Outorgáronse como cada ano (dende 2005) un total de 48 bandeiras, das cales media ducia recaen no litoral galego. Na listaxe ocupa un lugar especial a autorización, por parte da Xunta, do baleirado da mina de San Finx, en Lousame. Tamén están o ditame do Tribunal Supremo prorrogando a factoría de ENCE na ría de Pontevedra. Como novidade, aparece o Concello de Vigo por designar como praia canina o areal de A Calzoa (“sen preverse o grave impacto ambiental que se xerou, ao encher o areal de cans que afectan, coma noutros ouros casos semellantes, á fauna litoral, principalmente ás aves”). Tamén foi distinguida a mina de Touro, unha das grandes ameazas ambientais da ría de Arousa.
A listaxe de bandeiras negras podemos atopala no mapa en liña subido por Ecoloxistas en Acción.
Respecto do caso da mina de San Finx, a organización lembra que a autorización do seu baleirado “pon en perigo todo o ecosistema da ría de Noia, unha ría da que viven máis de 5.000 familias mariscadoras ou mariñeiras”.
A outra bandeira da provincia da coruña recaeu na mina de Touro e sinala, tamén, á Xunta pola “permisividade cos continuos vertidos procedentes dos terreos da mina que contaminan os regatos da contorna, os cales tributan no río Ulla, e este desemboca na ría de Arousa, carrexando ata alí a contaminación procedente da mina”.
