Este luns 5 de xuño comezan as accións de eliminación e control de especies exóticas invasoras no entorno fluvial do río Tins no Concello de Outes. Os traballos abéiranse ao proxecto Renatur_Outes (iniciativa de recuperación e posta en valor ambiental impulsada polo Concello, as universidades galegas e a Fundación Montescola) e na súa primeira xeira as e os protagonistas son os estudantes do IES Poeta Añón. A intervención centrarase na eliminación de varias manchas de acacia negra (Acacia melanoxylon) así como de exemplares individuais de mimosa (Acacia dealbata) e falsa acacia (Robinia pseudoacacia). En todos os casos utilizarase a técnica de descasque.
Segundo informan dende Montescola, o descasque consiste nunha incisión en anel por volta do tronco ata chegar á madeira (xilema) que permite remover a casca (floema e tecidos exteriores) desde o corte ata a raíz, facilitando que a árbore seque en pé. As participantes aprenderán a utilizar esta técnica de xeito práctico e a utilizala pola súa conta en intervencións futuras. Apenas é necesario unha pequena navalla ou obxecto incisivo similar para realizar o entalle do anel.
No eixo do proxecto están a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia, a limpeza de residuos da contorna fluvial, e a sensibilización medioambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. “Desde xeito non só se pretende alcanzar unha recuperación e mellora da biodiversidade, mais xerar un compromiso social máis alá da propia vida do proxecto”, informan dende Montescola e o Concello de Outes.
