O salón de plenos do Consistorio local deu cabida na tarde deste xoves 29 de xuño a unha recepción institucional ás xogadores do Club Pádel Ribeira logo de proclamarse campioas de Terceira División Absoluta de Galicia.
O evento estivo presidido polo alcalde en funcións, Manuel Ruiz, contando tamén coas intervencións do concelleiro de Deportes Javier Sampedro e da presidenta do club, Chus Abelleira, quen compartiu a aspiración a que a bandeira de Ribeira luza agora na praia de Maspalomas, nas illas Canarias, con ocasión da próxima celebración do título nacional.
Chus Abelleira anunciou tamén que o vindeiro 15 de agosto celebrarase o tradicional Torneo Cidade de Ribeira.
Pola súa parte, Manuel Ruiz destacou a importancia cobrada por este deporte dende que no ano 2014 habilitáronse pistas de pádel no Pavillón de Coroso e fixo fincapé na necesidade “dunha maior implicación por parte das empresas co deporte local”, tal e como acontece noutros municipios da redonda ou como ocorreu tamén no pasado en Ribeira en especialidades como o baloncesto ou no balonmán, xa que “sen un investimento suficiente é moi difícil participar en competicións importantes”.
Ao final, xogadoras e outros membros do club e autoridades sacaron unha foto nos soportais do Consistorio.
