Un total de sete alumnos/pacientes da Unidade de Día do Servizo de Drogodependencias de Ribeira que asisten ao obradoiro de carpintería estarán ao longo dunha semana na illa de Sálvora coa fin de realizar diversos labores de mellora do enclave.
Este xoves 22 de xuño na sede da UAD tivo lugar unha reunión preparatoria con presenza e participación entre outros da concelleira de Servizos Sociais, Ana Barreiro; o xefe da Unidade, Jesús Cartelle; o titor de carpintería, Jesús Cartelle; e o director do obradoiro de emprego Tahume VIII, Juan Manuel Pazos.
O obxectivo da actividade, sinalaron é “pór en valor do traballo da unidade como a restauración de espazos de gran valor arquitectónico e etnográfico, ademais do coidado do medio ambiente, xa que vai desenvolverse de forma sustentábel na propia illa de Sálvora”. En concreto, os usuarios restaurarán o paseo de madeira cara á praia do Almacén e porán a punto a varanda do mesmo, ademais de proceder á recollida de refugallos nas praias da illa.
Trátase, segundo destacou a concelleira Ana Barreiro, “dunha actividade cun gran valor inclusivo e integrador, xa que a convivencia entre persoas con diferentes problemáticas nun ambiente favorábel é moi positivo tanto dende o punto de vista da rehabilitación como da reinserción”.
Colaboración de Tahume VIII e Illas Atlánticas
A actividade celebrarase entre o 24 de xuño e o 4 de xullo e contará coa colaboración das dúas especialidades do Obradoiro de Emprego Tahume VIII (posto en marcha polos Concellos de Ribeira e Porto do Son), ademais do Parque Nacional Illas Atlánticas de Galicia.
A especialidade de cociña do obradoiro encargarase de elaborar as comidas e ceas que consumirán os usuarios ao longo da súa estadía na illa, en tanto que a especialidade de montaxe e confección de redes deseñará un aparello do cerco coa finalidade de que fique no pazo de Sálvora para ilustrar sobre esta arte aos visitantes do mesmo.
