Un ano máis, o Concello da Pobra do Caramiñal súmase á celebración do Día do Orgullo con dúas actividades. A concelleira da Igualdade en funcións, Charo Varela, e o seu homólogo da Mocidade, José Andrés Lojo, explicaron que se pretende así contribuír a visibilizar a reivindicación do colectivo LGBTI+ e, dunha maneira festiva, instar a promover- a tolerancia, a igualdade e a dignidade de tódalas persoas, “con independencia da súa orientación sexual e identidade de xénero”.
Se ben a propia data é o día 28, a programación desenvolverase no día 30 por ser venres e facilitar a asistencia das persoas interesadas. As propostas concentraranse nas inmediacións da praza Alcalde Segundo Durán.
Ás 20.00 horas encherase a tarde de cor coa festa Holi que precisa a inscrición previa en liña. Farase a entrega dunhas lentes e pigmentos en distintas tonalidades no propio día do evento, a partir das 19.45 horas. Anímase, ademais, a acudir con vestimenta branca para que as cores resulten máis vistosas.
E a noite estará amenizada pola Mega Disco Chocolate e algunhas sorpresas, das 23.00 horas en diante.
