O Concello de Rianxo organiza esta tempada de verán un programa completo de saídas turísticas en veleiro pola ría de Arousa para descubrir os tesouros do noso mar dende unha óptica diferente e co engadido extra de facelo nunha embarcación histórica, a goleta Evangelina, construída en 1912 e recentemente restaurada.
As persoas interesadas en embarcarse e en facer as reservas deberán acudir á Oficina de Turismo de Rianxo. Haberá dúas saídas diarias (pola mañá e no atardecer) durante os días 3, 5, 7, 10, 12, 13, 19 e 26 de xullo e os días 8, 10, 17, 22 e 30 de agosto. En setembro haberá saídas os días 5, 7, 12, 14, 19 e 21.
A embarcación escollida é a goleta Evangelina, con 110 anos de historia pola costa galega. Ten capacidade para 12 prazas e alcanza os 18,70m de eslora, 5 de manga e 1,65 de puntal. Construída nunha carpintaría de ribeira e restaurada nos Estaleiros Catoira de Rianxo, o seu porto base é en Rianxo, onde se pode contemplar acotío.
