O Concello de Dodro informou do remate do obradoiro creativo de pintura artística dirixido a transformar os paneis comunitarios de caixas de correo dos núcleos do termo municipal. As sesións, impulsadas dende a Concellería de Cultura e Patrimonio, contaron coa presenza da educadora e muralista Raquel Germade.
As actividades remataron en Manselle e saldouse coa plasmación nos paneis de motivos decorativos e artísticos variados, escollidos polos alumnos de pintura, relacionados coa aldea e tamén coa desaparecida olería de Lestrobe.
A iniciativa colleu impulso na recta final deste inverno e foi un programa de intervención participación (veciñal) para mellorar a estética dos paneis das caixas de correo que se atopan en desuso nos núcleos do termo municipal e que, por este abandono e pola muda de hábitos en relación á comunicación, viñan afeando as aldeas co seu proceso de deterioro e esquecemento.
O obxectivo do programa, amais do devandito, foi realizar un labor conxunto de recuperación e restauración dos paneis, seguido dunha intervención artística e pictórica sobre os mesmos, inspirada nunha pescuda sobre a vida veciñal “que sexa unha homenaxe á historia das aldeas e as súas xentes”, informou o Concello, poñendo o foco na importancia de poñer en valor estes obxectos comunitarios “cargados de simbolismo, atravesados polo tempo e testemuñas dun pasado común, dunha rede de mensaxes e historias persoas entrelazadas que configuran, tamén, a historia do concello”.
