No vai ser un doado comezo para España na súa presidencia da UE no segundo semestre deste ano, a convocatoria pola DG Mare dun novo “Consello” no que os Estados membros, o sector pesqueiro e os organismo científicos abordarán os próximos prazos da revisión dos peches a toda a pesca de fondo activados o pasado mes de outubro en 87 áreas de Portugal, España, Francia e Irlanda en virtude da aplicación do Regulamento de augas profundas de 2016.
Será xuntamente co informe dos economistas do STECF, o Comitè Científico, Técnico e Económico de Pesca da CE, que deberá determinar o impacto socioeconómico que pode ter o peche destas áreas. A ausencia deste informe -do que prescindira a Comisión nos primeiros peches- é outro dos motivos polos que España e o sector decidiron levar a Comisión aos tribunais e que, pesumiblemente, será presentado o vindeiro mes de xullo comezando deste xeito un período de consultas con Estados e partes interesadas que rematarán cunha decisión sobre o futuro dos peches a principios de 2024.
Administración e sector piden rigor en todo o proceso. A intención de Bruxelas é facer unha revisión anual de todo o proceso.
No sector pesqueiro existe moita incertidume e un certo sabor amarguento dado que se coñece e a recomendación do ICES sobre a existencia -ou posible existencia- de Ecosistemas Mariños Vulnerábeis nas batimetrías entre os 400 e os 800 metros, que servirá de base científica á revisión por parte de Bruxelas dos peches a toda a pesca de fondo nesas 87 áreas citadas.
E hai motiovos: o informe incrementa o número de áreas candidatas a seren protexidas, e sen embargo a extensión conxunta de todas elas é inferior. E amáis existen zonas pechadas nídiamente beneficiadas, como por exemplo o Golfo de Cádiz, mentres que a incorporación dos datos do IEO (Instituto Español de Oceanografía) -non incluidos na recomendación orixinal- estabelece potenciais novos peches en Cantábrico-Noroeste e golfo de Biscaia. A maior abondamento, só se incluiron datos de artes móbiles, é dicir, de arrastre de fondo, elemento clave do informe xa que logo deixa en mans da Comisión a decisión de seguir a aplicar os peches en todos os artes de fondo como decretou en outubro, decisión que levou en gran parte ao Goberno de España e asociados da OPP Burela a interpor senllos recursos xudiciais contra a Comisión perante o impacto causado no palangre de fondo, principal segmento afectado.
O labor que queda por de diante vai ser duro, porque España, xunto coa súa presidencia comunitaria vai xogarse nada menos que o presente e o futuro dun sector pesqueiro vital para comunidades como Galicia, Asturias, Andalucía e Canarias.
