O delegado do Goberno en Galicia, José Ramón Gómez Besteiro, visitou este mércores 24 de maio a vila Boiro para arroupar ao alcalde e candidato á alcaldía, José Ramón Romero, Martiño. Durante a estadía Besteiro e Martiño tiveron oportunidade de debullar as principais liñas do programa electoral, así como dos fondos Next Generation do Estado.
O actual rexedor e o secretario xeral, Luis Ruiz, presentaron ante José Ramón Gomez Besteiro e a militancia e simpatizantes as principais liñas do programa electoral co que os socialistas concorren ás eleccións do vindeiro domingo. “Trátase dun programa ambicioso e realista, que xorde das necesidades da veciñanza e do propio municipio para seguir medrando”, afirmou Martiño.
Os socialistas trasladáronlle a Besteiro a necesidade de dotar a Boiro e á comarca de novo terreo industrial. “Temos un problema e temos que poñerlle solución, non pode ser que en toda a comarca non quede un metro cadrado de chan industrial. As nosas empresas non teñen oportunidade de crecemento e iso vai acabar por afectar directamente á nosa economía”, afirmou o candidato á reelección, engadindo que o reto de xerar emprego é un dos principais piares do programa para os vindeiros catro anos. “Como tamén o é a consecución de novos fondos procedentes doutras administracións, como é o caso dos fondos Next Generation do Goberno de España”, explicou.
Os socialistas trasladáronlle ao delegado do goberno, nunha visita á Cachada, o agradecemento por poñer a disposición eses fondos que “a Concellos como Boiro nos dan un gran impulso xa que cos nosos fondos non poderíamos levar a actuacións como a modernización do mercado municipal ou a rehabilitación e ampliación da Casa da Cultura”.
