Juan Caballero.- O presidente de ADECO-DEA (Asociación Deportiva Costa Oeste – Deporte Adaptado) Pepe Barrio, xa advertía a pasada semana no arranque do Campionato Galego Inclusivo de Motonáutica disputado en Portosín, que “a tempada presentábase con moito nivel e máis competitiva que en anos anteriores”. E razóns non lle faltaban, xa que tras a celebración da segunda proba valedoira para o título autonómico demostrou que o abno de candidatos e candidatas ao cetro galego ten moitos novos talentos que están a empezar a aflorar.
O Centro Náutico do Freixo, no Concello de Outes, albergou este sábado esta segunda cita coa motonáutica inclusiva, convocada como organizadores desde o propio Concello de Outes, ADECO-DEA e a Real Federación Galega de Motonáutica.
O tempo medio establecido para esta segunda proba era de 4 min. 30 segundos, trazando unha xincana con boias a babor e estribor, fondeo, pelota-cesta, atracada e, como proba de dificultade engadida con respecto á xornada de Portosín, a captura dun aro mediante o bicheiro, amarrado a unha boia flotante que había que embarcar e volver largar.
Se o inicio do campionato tiña por titulares aos vigueses José Luis Álvarez e Gonzalo Riveira, a segunda proba tivo outro medalleiro ben distinto, sendo o ouro en Outes para os noieses Juan Carlos Silva e María Guldrís, que conseguían a mellor puntuación respecto aos segundos clasificados, o piloto de Sada Carlos Facal con Joaquín Bouzas de auxiliar, e aos terceiros, os tamén noieses Joaquín Barrio asistido polo propio Joaquín Bouzas.
“Antes de nada agradecer a organización do evento á Real Federación Galega de Motonáutica, á Agrupación ADECO-DEA e ao seu presidente Pepe Barrio, por permitir que Outes poida ser sede deste evento”, comentaba Daniel Rodríguez, concelleiro de Deportes de Outes.
“Desde o Concello de Outes serán sempre benvidos ás instalacións do Náutico do Freixo, onde teñen á súa disposición todo o material e persoal que necesiten para que a celebración desta proba transcorra coa maior normalidade posible”, matizaba o edil coruñés.
“É un pracer abrirlles estas instalacións, que contan cunha localización privilexiada ao fondo da ría con augas tranquilas para o seu uso deportivo, sendo esta proba unha mostra máis da aposta firme polos deportes náuticos que o Concello vén realizando no presente mandato. E, por último, felicitar aos gañadores e desexarlles sorte a todos os participantes nas seguintes probas que quedan para finalizar o campionato”, terminaba dicindo Rodríguez.
A terceira proba terá por sede a localidade pontevedresa de Tomiño, o sábado 3 de xuño.
