O candidato á alcaldía de Noia polo PSOE, Fran Pérez, realizou un acto de presentación do seu programa económico ante o empresariado noiés. Foi este martes 23 de maio na Casa da Cultura, na compaña de Beatriz Sestayo, xerente da empresa pública encargada do desenvolvemento dos parques industriais: SEA.
Esta xuntanza centrouse en trasladar ao empresariado noiés un programa económico “orientado ao crecemento, ao desenvolvemento do potencial deste concello”, en palabras do propio candidato. Para isto, dixo, sería “imprescindible a ampliación do solo industrial co que contamos”. Sestayo incidiu na “idoneidade de Noia para a ampliación de solo e a creación dun polígono máis amplo”, asegurando que “os concellos lindeiros xa experimentaron crecementos semellantes, e moitas empresas están a buscar espazo nesta zona e xa non o atopan”. Porén dixo, para isto é necesario que o Concello teña interese e
estea disposto a traballar e implicarse no proxecto. O resto de facilidades poñémolas nós”, explicou a xerente de SEA.
Na reunión, os empresarios presentes tiveron a oportunidade de dirixirlles preguntas sobre detalles específicos do programa e valoracións sobre a situación actual do Concello. Neste último senso, e ante unha pregunta dirixida por un dos presentes, Sestayo afirmou que “a ampliación pódese facer, pero nestes últimos catro anos non tivemos noticia de que o Concello tivese interese algún en realizala. A nós non nos chamaron”, indicou.
“É tan sinxelo como intentalo, como poñerse a traballar para conseguilo”, comentou o candidato. “O que está claro”, finalizou o aspirante á alcaldía de Noia e ex-presidente da Asociación de Empresarios Noia Histórica, “é que quen tivo oito anos para facelo e non o fixo non o vai facer en doce. Nós xa empezamos a traballar hai meses”.
