O Concello de Dodro celebrará o Día das Letras Galegas coa presentación do libro Neve, da escritora Brenda Mondelo, gañadora do XXXV Premio de Poesía Eusebio Lorenzo Baleirón.
O acto terá lugar ás 17.30 horas no Pazo de Lestrobe. Acompañarán á autora representantes da editorial Chan de Pólvora, encargada do deseño e impresión da obra, a poeta Elvira Ribeiro Tobío, coordinadora do Premio de Poesía Eusebio Lorenzo Baleirón, o concelleiro de Cultura e Patrimonio, Xoán Xosé Vicente Franco e o alcalde do Concello de Dodro, Francisco Xabier Castro Tourís. O público asistente recibirá como agasallo un exemplar do libro premiado.
No marco deste acto tamén haberá espazo para unha homenaxe ao intelectual Francisco Fernández del Riego, neste caso, coa actividade Música e palabras do escritor Xurxo Martínez, da soprano Anna Mélikhova e da pianista Paula Gago.
O Concello de Dodro aproveitará esta celebración para amosar o seu compromiso coa lingua e cultura galega e lembrar que o municipio é un lugar destacado na cartografía das nosas letras grazas a grandes poetas como Eusebio Lorenzo Baleirón.
A semana das Letras Galegas rematará o venres 19 de maio, ás 18.00 horas, na Casa da Cultura coa actuación de Inventi Teatro e a presentación da súa obra As palabras perdidas; unha proposta teatral para público familiar subvencionada pola Rede Cultural 2023, da Deputación Provincial da Coruña.
