A maxistrada do Xulgado de Instrución número 3 de Ribeira decretou o ingreso en prisión provisional, comunicada e sen fianza de dúas dos tres detidos pola brutal agresión a un mozo de 27 anos o pasado domingo no municipio ribeirense.
Ambos están acusados dun delito de intento de homicidio e un deles ademais está a ser investigado por un delito de tenencia ilícita de armas. O terceiro home foi posto en liberdade, xa que só está a ser investigado por un delito de encubrimento. Os detidos foron sorprendidos pola Policía Nacional en Tui, mentres tentaban fuxir cara a Portugal.
Todos eles están a ser investigados pola brutal agresión na rúa Diego Delicado ás 03:00 horas do domingo 19 de maio. Acúsaselles de perseguir á vítima despois de encerellarse previamente na noite e ao enfrontarse con el, apuñalalo en dúas ocasións e dispararlle. O mozo tivo que ser atendido e intervido de urxencia primeiro no Hospital do Barbanza e despois no Clínico de Santiago. Segue aínda ingresado en Compostela, aínda que xa fóra de perigo e en planta.
Ambas as armas utilizadas na agresión foron atopadas polos corpos de seguridade. Os axentes atoparon o coitelo nas intermediacións do incidente o propio domingo, mentres que a arma de lume usada foi achada onte no porto de Ribeira, tras un operativo da man da Unidade Subacuática da Policía Nacional.
