A Xunta comezou este martes as obras da nova vía de conexión da aldea de Fafián, que suporán un investimento total de 860.000 euros, nos que se inclúe o pagamento das expropiacións necesarias para executar estas obras. Esta actuación forma parte da Variante de Ribeira, que comeza así a materializarse.
Os traballos, que foron adxudicados á empresa Construcciones Ponciano Nieto S.L., consisten na execución da nova conexión entre a estrada provincial DP-7305, que conecta Ribeira con Aguiño a través de Carreira, e a aldea de Fafián.
As obras que veñen de iniciarse constitúen o primeiro paso do desenvolvemento da Variante de Ribeira. Contan cun prazo de execución de 12 meses, polo que se prevé o seu remate na primavera do 2024.
Máis concretamente, estanse a iniciar os traballos de execución dos 220 metros de lonxitude que terá a nova vía, que comeza na conexión coa estrada da deputación mediante a execución dunha glorieta de 34 metros de diámetro e finalizando en Fafián, cunha intersección en “T”.
Esta vía de novo trazado disporá de 2 carrís de 3,5 metros de ancho e beirarrúas de 2,10 metros. As beirarrúas na marxe da estrada garantirán un itinerario peonil continuo e seguro para o tránsito dos veciños.
Como intervencións complementarias, procederase á reposición do firme dos viarios urbanos afectados; e á reposición dos camiños de servizo, executando dous pequenos treitos para garantir o acceso ás leiras.
Ese pequeno tramo de 220 metros de nova vía permitirá captar un tráfico estimado de case 4.300 vehículos, o 3,4% de vehículos pesados.A actuación correspóndese coa parte inicial do 3º treito da Variante de Ribeira, cuxo proxecto de trazado completo está aprobado, e a resolución da aprobación do expediente de información pública, do proxecto de trazado e do estudo de impacto ambiental foi publicado o pasado mes de outubro. A Variante de Ribeira suporá un investimento autonómico conxunto de 10,3 M€.
