O actual alcalde boirense, José Ramón Romero, Martiño, concorre nestas eleccións municipais de maio de 2023 cunha candidatura que, segundo apunta, “combina a experiencia de aquelas persoas que estiveron no goberno dos últimos catro anos con novas incorporacións”. Roberto Lojo e Carmen Silva formarán parte, nos postos sete e oito, dos dez primeiros membros da candidatura.
Carmen Silva é natural de Abanqueiro e mestra de secundaria, polo que vén a aportar ao equipo de traballo a súa experiencia no eido do ensino e o traballo con rapaces e rapazas. “Carmen é unha persoa moi curiosa e enérxica, sempre pendente das demandas dos seus veciños e que fará unha gran aportación ao goberno local”, afirmou o rexedor.
Pola súa banda, Roberto Lojo traballa no sector sociosanitario dende fai máis de 25 anos e tamén está vinculado con entidades educativas e deportivas do municipio. “Roberto xa formou parte do noso equipo en 2019 e sempre está pendente de transmitir as demandas da veciñanza, polo que vai reforzar moito o actual equipo de traballo”, recoñeceu o candidato, engadindo que nestas eleccións “reforzamos os dez primeiros postos da candidatura mesturando a experiencia de aqueles que levan xa catro anos comigo no goberno con outras persoas que, nas súas áreas, está moi relacionadas coa sociedade boirense e coas necesidades do municipio para aportar novas ideas”, dixo Martiño.
