O Concello de Boiro recibiu da Axencia Galega de Turismo unha subvención para actuacións de embelecemento do litoral convocadas no marco do Plan de Recuperación, Transformación e Resiliencia financiado pola Unión Europea-NextGenerationUE.
A subvención recibida consta de tres liñas distintas. A primeira delas de transición verde ecolóxica para a rehabilitación do patrimonio de espazos singulares da costa, dun importe de 80.000 euros, para a recuperación dos xardíns do Pazo de Goiáns.
A segunda das liñas concorridas é a de transición dixital dos recursos con potencial turístico no litoral. O proxecto presentado para esta liña é o desenvolvemento de códigos QR en recursos turísticos, para o que se recibe un importe de 6.534 euros.
A terceira das liñas desta subvención está enmarcada na transición accesíbel e inclusiva para un turismo máis competitivo. A proposta presentada e que se dota de financiamento mediante a achega de 50.000 euros é a da mellora de camiños existentes no parque da Cachada para favorecer a accesibilidade ao recurso turístico.
