A subdelegada do Goberno na Coruña, María Rivas; o alcalde de Boiro, José Ramón Romero, e o tenente coronel xefe interino da Comandancia da Garda Civil da Coruña, Fernando Pedreira, asinaron este xoves 11 de maio o protocolo de adhesión ao sistema Viogén de protección de mulleres vítimas de violencia de xénero.
Con Boiro, son xa 22 os concellos da provincia da Coruña que se incorporan a esta ferramenta tecnolóxica de seguimento e protección, en palabras de Rivas “un recurso imprescindíbel e necesario para avanzar na protección das vítimas da violencia machista”. A subdelegada aproveitou a súa estadía en Boiro para facer un chamamento a aqueles concellos que que aínda non se adheriron ao sistema a Viogén para que o fagan “e seguimos dando os pasos correctos na erradicación da violencia contra as mulleres”.
Como lembraremos, o sistema Viogén permite que a Policía Local dispoña de máis información sobre todos os casos activos de violencia machista no municipio. Deste xeito, os propios axentes locais pasan a asumir o seguimento e control dalgúns destes casos, xeralmente daqueles que son considerados de nivel de risco baixo ou non apreciado. Nos casos de maior risco é a Garda Civil a que se encarga do seguimento.
Actualmente na provincia da Coruña son 1.979 as vítimas de violencia de xénero con casos activos na provincia, unha cifra que demostra a importancia de contar con estes sistemas de vixilancia e protección.
A subdelegada trasladou ao alcalde, José Ramón Romero o seu agradecemento polo esforzo realizado no desenvolvemento das políticas de igualdade e de loita contra a violencia de xénero, tal como evidénciase nas medidas adoptadas e que culminarán coa incorporación da Policía Local ao sistema Viogén.
