Amicos recibe un premio europeo polo seu proxecto Remar III

30 Maio 2023

A asociación da nosa comarca Amicos foi distinguida co Premio Sky Blue que concede a entidade europea EU4Ocean Coalition. A entidade inclusiva recibiu o dito recoñecemento polas importantes contribucións e implicacións do proxecto Remar III.

O premio foi entregado a Amicos este 25 de maio na Bretaña francesa, en Brest, no marco das xornadas EMD 2023 (European Maritime Days), de mans da coalición EU4Ocean. No dito certame (premios MakeEuBlue) quíxose distinguir proxectos que contribúan a incrementar o coñecemento da cidadanía sobre os mares e os océanos, e incrementar a sensibilización sobre a importancia dos recursos mariños, a súa preservación, e a contribución que podemos facer todas e todos para garantir a sustentabilidade.

“Estamos moi orgullosos dos nosos axentes do cambio en Amicos, e tamén moi agradecidos por este premio a todas as entidades que colaboran na preservación e na mellora da nosa contorna costeira, do compromiso pola conservación e a mellora da xestión ambiental con buque azul”, fixeron saber fontes da asociación da nosa comarca, engadindo que “este recoñecemento anímanos e inspíranos a continuar neste esforzo para protexer os nosos océanos”.

Por certo que a área de Pekes de Amicos tamén recibiu a certificación EuBlueSchools, co que a asociación pasa a integrarse na rede europea de colexios comprometidos dende a educación para difundir mellores prácticas e hábitos para a preservación dos mares.

Sobre Re-Mar III
Re-Mar III foi a terceira edición do proxecto de Amicos que pon o foco na protección ambiental mariña a través da formación, as accións a pé de praia-costa e o emprego sustentábel.

Durante a súa execución leváronse a cabo 5 pílulas formativas relacionadas co mar, nas que se formaron 110 persoas con discapacidade ou en risco de exclusión social. En portos deportivos, praias e centros educativos realizáronse máis de 50 accións de sensibilización coas que se conseguiu concienciar a máis de 5000 persoas.

Nas accións de limpeza realizadas participaron máis de 500 escolares, 120 traballadores do mar e 80 voluntarios de empresas, e logrouse retirar máis de 1 tonelada de lixo.

Os activistas ambientais de Amicos realizaron 34 limpezas, 2 delas en caiac e outras 2 de fondos mariños con mergulladores.

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...