Antón Luaces.- Nas primeiras horas do venres podería chegar ao porto de Ponta Delgada, na illa de Sâo Miguel, no arquipélago dos Azores, o palangreiro de A Guarda Algamar, a bordo do que viaxan os 12 tripulantes do tamén palangreiro Lajes do Pico afundido o martes pola tarde a pouco máis de 300 millas (fóra da Zona Económica Exclusiva de Portugal) ao norte da illa das Flores. Entre os náufragos (maioría de cidadáns indonesios) atópase o patrón do buque, un ribeirense que leva varios anos desempeñando esta función. O afundimento foi causado por unha vía de auga a popa producida, ao parecer, polo rebentón dunha chapa.
Por máis que a tripulación do Lajes do Pico fixo por achicar a auga que entraba no barco non daban feito, motivo polo que activaron a radiobaliza do pesqueiro, emitindo unha petición de axuda e rescate captada pouco despois das 07,30 horas do martes no Centro de Busca e Salvamento de Ponta Delgada, que mobilizou varios buques de salvamento, pesqueiros (entre estes tres palangreiros guardeses) e mercantes na zona, así como unha aeronave da Forza Aérea lusa.
Os 12 tripulantes do pesqueiro afundido foron rescatados polo palangreiro guardés Algamar (pertencente á organización ORPAGU) após varias horas de permanencia na balsa salvavidas que arriaran previamente.
O pesqueiro Lajes do Pico, con bandeira de Portugal e base en Ribeira (o armador tamén é de Ribeira) afundiu pouco despois das catro da tarde do martes. Ten 30 metros de eslora e 7 de manga e fora construído no ano 1999 para se adicar á captura de peixe espada, ollomol, mero e pescada.
