A Cooperativa Santa Eugenia de Ribeira (OPP83) levou a cabo este martes 30 de maio, no CEIP O Grupo, un gran encontro participativo e divulgativo para reivindicar ante a rapazada os beneficios de consumir peixe. A Xornada do Mar de Ribeira celebrouse con alumnas e alumnos de quinto e sexto de Primaria. A cita artellouse arredor de tres obradoiros onde as/os protagonistas tiveron a oportunidade de ampliar os seus coñecementos sobre a pesca e os beneficios do peixe para levar a cabo unha alimentación e vida saudábel. Ademais, as nenas e os nenos gozaron dun snack de lirio en tempura.
Os talleres foron os seguintes: unha entrevista ao armador de arrastre da OPP83 a través de preguntas dos nenos (o armador explicou como é o seu día a día e a vida dun empresario do mar na actualidade), unha sesión divulgativa sobre hábitos alimenticios saudábeis coa bióloga María Abal (que brindou unha charla onde deixou en claro as razóns polas cales é importante o consumo do lirio e os beneficios que ten o peixe no noso día a día) e unha campaña publicitaria (onde os máis pequenos debían deseñar e desenvolver anuncios coa finalidade de promocionar o consumo do lirio de Ribeira, unha actividade na que quedou patente a creatividade e o bo facer dos pequenos).
Na xornada tamén participaron profesionais da hostalería mostrando ante o alumnado diferentes xeitos de preparar peixes e mariscos, poñendo o foco no gran protagonista da sesión: o lirio.
Foi, en palabras dos responsábeis da Cooperativa Santa Uxía, “unha mañá chea de anécdotas e diversión onde, a través do xogo, os máis pequenos puideron coñecer máis a fondo un dos piares económicos do concello: a pesca, e descubrir tamén todos os beneficios que a día de hoxe ten o peixe para poder realizar unha dieta rica, sa e saudábel.
Esta acción, incluída no Plan de Produción e Comercialización (PPyC) anual 2023, ten como obxectivo dar a coñecer a actividade da Cooperativa Santa Uxía de Ribeira – OPP83 e tamén incentivar o consumo de peixe entre os máis pequenos da casa.
