A xunta de Goberno do Concello de Rianxo deu vía libre á solicitude presentada pola Axencia Galega da Industria Forestal da Xunta de Galicia, na que se solicitaba licenza municipal para as obras contidas no Proxecto Básico e de Execución de Base Integrada de Unidades Operativas (BUO) de Rianxo. Como lembraremos, este proxecto vaise desenvolver nunha parcela de equipos no Parque Empresarial cedida polo Concello de Rianxo a Medio Rural e implicará a construción dunha base contra incendios forestais permanente no que é a primeira base operativa na comarca.
O proxecto presenta un orzamento de 441.391,55 euros un prazo de execución de seis meses. Entre os obxectivos deste equipamento inclúese o de converterse nun espazo adicado á defensa do monte, pero tamén nunha contorna referencial (medioambiental e construtivamente falando) no Parque Empresarial de Rianxo, en parte “polos materiais empregados e en parte por minimizar o impacto da edificación prevendo futuras ampliacións”, explicou o Concello, engadindo que do que se trata é de” xerar un contedor de servizos de protección forestal, que poda funcionar como nodo de todos os axentes participantes neste labor, favorecendo a conciliación entre descanso e traballo dos brigadistas, pero sen esquecer a integración nunha contorna tan sensíbel”.
O Concello apunta que para reducir ao mínimo o impacto da edificación, optouse por fragmentar o seu volume, “en tres ás diferenciadas”, unha aberta, e outras dúas consistentes nuns volumes pechados. O Consistorio tamén destaca o uso do castiñeiro e piñeiro como elementos construtivos ou a cuberta axardinada ou as cores que se empregarán.
Outro dos mecanismos de integración é a inclusión de parasois emparrados e que voan sobre a paisaxe, minimizando o impacto da solleira na área de comedor e de descanso.
Pegada de carbono negativa
Ademais de procurar unha construción quilómetro cero, empregando sistemas construtivos e materiais de proximidade, coa construción en madeira, obtense unha pegada de carbono negativa.
Ademais da propia construción, a eficiencia enerxética en tódalas instalacións, con sistema de climatización por aerotermia, recuperadoras de calor, e sistemas de control e regulación para as luminarias LED.
