A maior parte da cidadanía non se cansa en lembrar de que a Administración Tributaria, case sempre, limítase a comprobar, inspeccionar ou requirir documentación ás pequenas empresas, traballadores autónomos ou ben a empregados por conta allea. Case nunca se lembran das grandes empresas. Un bo amigo comentábame, non hai moito tempo, que “en España as grandes empresas non pagan nin un céntimo de euro”, ou como máximo o 3% dos seus beneficios. Todo debido á enxeñería financeira, por contar co asesoramento dos mellores economistas, asesores fiscais e financeiros. Non lle falta razón.
A pesar de todo, de cando en vez, a cidadanía lévase algunha que outra alegría dos Tribunais de Xustiza que poñen no seu lugar algúns argumentos inxustos esgrimidos pola Administración Tributaria. Así sucede cunha Sentenza do Tribunal Supremo pola cal “as herdanzas recibidas mediante pactos sucesorios entre vivos (inter vivos) non tributan no IRPF”. A Administración Tributaria optaba por considerar que as achegas de herdanza, en vida, eran consideradas como ganancias patrimoniais, cos consecuentes prexuízos económicos para moitas familias. Nalgunha comarca hai contribuíntes que tiñan que facer fronte a pagos de preto de 20.000 euros, por este tipo de transmisións, considerados agora non lucrativas, cando non estaban nin obrigados a presentar a declaración da renda por non chegar aos ingresos mínimos.
Que vai pasar, agora, cos contribuíntes que tiveron que pagar esas cantidades desorbitadas que non lles correspondían? Vai ter carácter retroactivo? Ao final como sempre…, non. Polo menos é importante lembrar que o propio Tribunal Económico Administrativo Rexional de Galicia estaba xa fallando contra a A.E.A.T ao entender que os pactos sucesorios de mellora e apartamento do Dereito Civil de Galicia non tributaban no IRPF.
