Este sábado, 22 de abril, ás 20h30, terá lugar na sala Arcos Moldes do Auditorio de Rianxo o concerto De não saber o que me espera, a cargo do trío galego Nacho · Faia · Lar, que é como se coñece a unión entre Faia Díaz, Nacho Muñoz e Lar Legido. Presentarán un repertorio do artista portugués Zeca Afonso, nunha actuación que combina elementos tradicionais, vangarda e experimentación.
A cantante Faia Díaz mostrará unha visión artística especial sobre as cancións seleccionadas do artista portugués, creando unha dimensión contemporánea e transgresora, coa axuda da experimentación electrónica do recoñecido músico vigués Nacho Muñoz e a batería do investigador sonoro Lar Legido. “A presentación promete ser un diálogo musical transfronteirizo que vai máis aló do espazo-tempo”, explican dende a Área de Cultura do Concello de Rianxo.
A entrada é de balde ata o límite da capacidade da sala (máximo de 2 entradas por persoa) e os convites deben ser retirados unha hora antes do comezo do concerto.
