A Consellería do Mar, a través de Portos de Galicia, contratou a un estudo arquitectónico a redacción dunha proposta preliminar de ordenación arquitectónica da fachada marítima de Noia. O obxectivo deste labor é “aportar unha concepción global dos espazos para desenvolver a chancela portuaria de Labarta, no municipio”, segundo fixos saber a presidenta do ente público, Susana Lenguas, nunha reunión de traballo co Concello de Noia e o estudo de arquitectura adxudicatario dos traballos e que se celebrou esta semana na zona portuaria da localidade, xuntanza na que participou o alcalde Santiago Freire.
Neste encontro expúxose a proposta de ordenación encargada polo ente público. Ao remate da reunión, Lenguas destacou que houbo coincidencia plena na importancia do porto de Noia como espazo para dar acubillo a eventos de toda índole (culturais, deportivo) que se vezan potenciados coa habilitación dun aparcadoiro acorde.
En relación coa chancela portuaria de Labarta, Susana Lenguas explicou que “Portos de Galicia busca que a solución que se presente contemple en detalle as necesidades actuais e manteña coherencia coa contorna da fachada marítima”. Para isto, dixo, “é necesaria unha perspectiva xeral do espazo baseada na ordenación, integración paisaxística, mellor aproveitamento da superficie portuaria e posta en valor da franxa litoral do municipio”.
Lenguas engadiu que as posibilidades de mellora desta “franxa terían en conta a necesidade de preservar ou ata ampliar as zonas de aparcadoiro de turismos e autobuses, e á vez farían compatíbel ese uso cunha ordenación da xeometría dos espazos que permita mellorar a vista cara ao mar ou integrar novos elementos mantendo a coherencia visual”.
