Na tarde do martes 18 de abril desenvolveuse o último pleno ordinario do mandato no Concello de Dodro, unha sesión que, en palabras dos grupos de Goberno, “amosou unha vez máis a unidade das tres agrupacións do Executivo ao longo dos catro anos da lexislatura”, e na que non compareceu a oposición.
Entre os moitos puntos a tratar, as tres agrupacións destacaron a resolución da cesión gratuíta dos terreos que ocupan os cemiterios ás respectivas asociacións de propietarios dos cemiterios de San Xoán de Laíño e de San Xián de Laíño. “Con esta resolución”, explicaron os integrantes do Goberno local, “púxose remate a un conflito xerado durante o anterior mandato do PP”. E engadiu o concelleiro Xoán Bautista Mariño: “Cremos sinceramente que co acto plenario de hoxe damos boa resposta á veciñanza. Cumprimos coa nosa palabra de goberno e tamén serve este acto para dar as grazas ao persoal que arrimou o ombreiro neste caso.”
O outro punto a importante do día foi a aprobación do Orzamento Municipal que para este
ano 2023 ascende a 2.734.011,34€. Das contas, os grupos salientaron o incremento significativo en
servizos sociais, área na que desenvolveu o seu traballo o BNG, que pasou dos 693.884,79€ en
2018 aos 820.89,28€ para 2023, un 57,67% máis.
Todos os puntos tratados neste último pleno ordinario contaron co voto favorábel do BNG e
dos outros dous grupos de Goberno.
